काठमाडौंबाट दोहा उड्दै गरेको बिमान झन्डै…

काठमाडौं, १८ वैशाख । नेपाल वायुसेवा निगमको जहाज चढेर दोहा उड्न विहीबार साँझ ८ बजे त्रिभुवन अन्तर्राष्ट्रिय विमानस्थल पुगेका यात्रुहरुले ६ घन्टाको पर्खाईपछि अर्को दिनको बिहान २ बजे फर्केर राजधानीकै होटल बास बस्नुपर्ला भनेर सायदै कल्पना गरेका थिएनन् ।

तर, निगमको इन्जिनियरिङ्ग व्यवस्थापकीय लापरबाहीका कारण उक्त उडानमा रहेका १ सय ९० यात्रुले यस्तै सास्ती भोग्नुपर्यो । जो शुक्रबार साझसम्म पनि काठमाडौंमै थिए ।

निगमको दोहा उड्न तयार रहेको रजिस्ट्रेसन भएको जाहाजको मौसम रडार प्रणालीमा देखिएको सामान्य खराबी बेलैमा मर्मत नहुँदा नेपालीसहितका यात्रुहरुले रातभर दुःख झेल्नुपर्यो ।

गण्डकी नाम दिइएको उक्त विमानको दोहा उड्ने तालिका ११ बजेर २० मिनेटमा थियो । तर, २ बजेसम्म पनि उड्न नसकेपछि यात्रुहरुलाई होटलमा राखियो ।

राति केहीलाई न्यूरोड त केहीलाई गौशालाका मध्यमस्तरीय होटलमा सुताइयो ।

‘राति १२ बजे वन्द हुने विमानस्थललाई लिखित अनुरोध गरेर २ बजेसम्म खुलाइए पनि कामै लागेन’, निगम स्रोतले भन्यो ।

स्रोतका अनुसार, दोहाका लागि उड्ने उक्त विमानमा जब क्याप्टेन आरजेबी राणाको टिम ककपिटमा पुग्यो । उनीहरुले राडारमा समस्या रहेको थाहा पाए ।

आफूअघि उक्त जहाजलाई भारतको बैंलोर पुर्याएर ल्याएका क्याप्टेनले रडारमा खराबी देखिएको रिपोर्ट लगबुकमा लेखेको देखेर क्याप्टेन राणाको टिमले जहाजमर्मत गर्न निगमको इन्जिनियरिङ्गलाई भनेको थियो ।

‘रातिको मौसम देखाउने भनेकै जहाजभित्रको वेदर–रडार हो तर त्यसले कामै नगर्ने भएपछि जहाज उडाउनै सकिँदैन’, एक पाइलटले भने ।

ती पाइलटका अनुसार, उक्त जहाजलाई दोहाका लागि उडाउनुअघि क्याप्टेन सुधीर राईले भारतको बैंलोर पुगाएर ल्याएका थिए ।

फर्किदा रडारमा समस्या देखिएपछि क्याप्टेन राईले लगबुकमा लेखि छाडेका थिए ।

बेलुकीमात्रै रडार मर्मतमा लागेको इन्जिनियरिङ्ग विभागले विमानलाई ११ बजेभित्र मर्मत गरी उडानका लागि रिलिज गर्ने जानकारी आफ्नो फलाइट अपरेशन विभागलाई गराइसकेका थिए ।

त्यसै अनुसार, दोहा उड्ने यात्रुलाई चेकजाँच गराइ तयार अवस्थामा राखिएको थियो । तर, इन्जिनियरहरुले ११ बजे होइन शुक्रबार बिहानसम्म पनि उक्त विमानलाई उडानका लागि योग्य बनाउन सकेका थिएनन् ।